سقوط القدم بعد التخدير النصفى
مقدمه
تعرف أن فى بعض الحالات القليلة ممكن يحصل سقوط القدم و ضعف فى حركتها بعد التخدير النصفي، سواء كان التخدير لتدخل جراحى أو ولاده طبيعيه أو قيصريه ؟
متقلقش, و خلينا نعرف أكتر مع بعض ايه المشكله
طب ايه هو التخدير النصفى؟
التخدير النصفي هو نوع من التخدير يتم فيه حقن مادة مخدرة حول الحبل الشوكي، عادة في الحيز المحيط بالأعصاب و الأم الجافية . هذا يؤدي إلى فقدان الإحساس والحركة في الجزء السفلي من الجسم بشكل مؤقت، ويُستخدم عادة في كثير من التدخلات الجراحيه مثل الولادة، وجراحات العظام، والمسالك البولية.
في الغالب، يكون هذا النوع من التخدير آمنًا جدًا، ويُعد من الإجراءات الروتينية ذات المضاعفات النادرة.
ما هو سقوط القدم؟ و هل هو مؤقت؟
سقوط القدم يعني إنك مش قادر ترفع قدمك لفوق كويس، وده بيخليك تجر قدمك وإنت ماشى و يخلى فى صعوبه فى المشى, لدرجه أن المريض ممكن يحتاج يرفع ركبته عاليا عشان ميجرش رجله على الارض
فى أغلب الحالات الى بيحصل سقوط القدم بعد التخدير النصفى أو بعد عمل بذل للسائل النخاعى من الظهر بتكون بسبب تهيج أو التهاب مؤقت في الأعصاب المسئوله عن حركة القدم, و أحيانا ممكن يبقى مصاحب لها ألم و خدل فى القدم
و أحب أطمنكم إن الموضوع غالبًا بيكون مؤقت, مش بيعمل ضرر دائم الحمد لله وبيتحسن مع الوقت والعلاج الطبيعي.
بس مهم نستثنى الأسباب الخطيرة
لكن مهم جدا استثناء الأسباب المهمه, مثل حدوث ضغط على العصب سواء كان ناتج لانضغاط العصب الشظوى عند مروره من عند الركبه مما يؤدى لالتهاب و ضعف بالعصب, و بنحتاج نعمل رسم عصب بيأكد أو ينفى التشخيص ده. و انضغاط العصب ده ممكن يحدث فى اى عمليه و مع أى نوع تخدير, و ليس مخصوص مع التخدير النصفى. لأنه مرتبط بوضع المريض خلال التدخل الجراحى
و تانى حاجه مهمه جدا, أن يتم عمل رنين مغناطيسى على الفقرات القطنيه لاستثناء الحالات النادره جدا الى ممكن تكون سبب الضعف, مثل حدوث نزيف فى القناة العصبيه أدى إلى ضغط على العصب المسئول عن تحريك القدم فاصبح لا يعمل بكفائه, و السبب ده مرتبط فقط بحالات التخدير النصفى. و الحالات النادره دى بتحتاج تشخيص سريع و أحيانا ممكن تحتاج تدخل سريع لتجنب حدوث ضعف دائم. و التدخل ده غالبا بيبقى فى صورة تدخل بسيط لرفع الضغط المتكون على العصب عشان نديه فرصه للتعافى. و نتجنب حدوث تلف دائم فى العصب و حدوث ضعف مستمر للقدم قد لا يتحسن
كيفيه التعامل و العلاج مع سقوط القدم؟
لو عندكِ مشكلة في سقوط القدم، ما تترددش أنك تتكلم مع دكتورك
أهم حاجه التشخيص المبكر و السريع لتجنب الأسباب النادرة الى ممكن تؤدى لضعف دائم بحركه القدم
و بعد كده الدكتور هيساعدك بأدويه منشطه للعصب, و أداء تمارين معينة و جلسات علاج طبيعى مكثفه لتنشيط العصب و العضلات المتأثرة, و ممكن يقترح عليك استخدام دعامة للقدم عشان تدعمها وانت بتتعافي
والأهم، خد وقتك في الشفاء؛ الموضوع بياخد وقت، ومع العلاج الصحيح هترجع لحياتك الطبيعية إن شاء الله
