العلاج الطبيعى مش مجرد مساج أو شوية تمارين عادية.. ده جزء مهم جدًا من الخطة العلاجية فى مشاكل المخ والأعصاب والعمود الفقرى

و بمناسبة اليوم العالمى للعلاج الطبيعى، حابب أوضح نقطة مهمة جدًا، وهى إن علاج مريض المخ والأعصاب والعمود الفقرى مش دايمًا بينتهى بمجرد انتهاء العملية أو الدواء

فى جراحة المخ والأعصاب، أوقات كتير بيكون التدخل الجراحى أو الدوائى هو نص المشوار، والنص التانى والأساسى لاستعادة الحركة والاعتماد على النفس والرجوع للحياة الطبيعية بيكون من خلال التأهيل والعلاج الطبيعى المناسب للحالة

لأن الهدف مش بس إننا نعالج السبب أو نرفع الضغط عن الأعصاب، لكن كمان إننا نساعد المريض يستعيد الوظيفة اللى اتأثرت ويرجع يمارس حياته بأكبر قدر ممكن من الاستقلالية

طب ليه العلاج الطبيعى مهم جدًا لأمراض المخ والأعصاب والعمود الفقرى؟

إعادة تدريب المخ (Neuroplasticity)
الجهاز العصبى عنده قدرة عجيبة على التكيف وإعادة تنظيم نفسه، ودى بنسميها الـ – Neuroplasticity – بعد الجلطات أو إصابات المخ والحبل الشوكى وبعض الأمراض العصبية، العلاج الطبيعى بيساعد المخ والجهاز العصبى على تعلم واستعادة بعض الوظائف الحركية من خلال التكرار والتدريب الصحيح والمستمر. وعشان كده، التأهيل مش مجرد حركة للعضلات، لكنه كمان نوع من إعادة تدريب الجهاز العصبى نفسه

استعادة الحركة بعد الجراحات
سواء بعد جراحات الانزلاق الغضروفى، أو الزحزحة الفقرية، أو اختناق القناة العصبية، أو جراحات نزيف وأورام العمود الفقرى، العلاج الطبيعى بيساعد المريض تدريجيًا على استعادة قوته وحركته والرجوع لنشاطه الطبيعى. وطبعًا توقيت بداية العلاج ونوع التمارين بيختلف من حالة للتانية، ومش كل مريض ينفع يبدأ نفس التمرينات أو فى نفس الوقت

تحسين التوازن والتنسيق الحركى
فى بعض أمراض المخ والأعصاب، المشكلة مش بتكون فى قوة العضلات بس، لكن ممكن تكون فى التوازن أو التنسيق بين أجزاء الجسم. وهنا العلاج الطبيعى بيساعد المريض على تحسين المشى، والتوازن، والتحكم فى الحركة، وتقليل فرص السقوط والإصابات

تحسين جودة الحياة فى الأمراض العصبية المزمنة
فى حالات زى باركنسون/الشلل الرعاش، التصلب المتعدد، وبعض أمراض الأعصاب الطرفية، العلاج الطبيعى ممكن يكون جزء مهم من خطة العلاج للمساعدة فى الحفاظ على الحركة والمرونة والقوة والقدرة على أداء الأنشطة اليومية. والهدف هنا مش بس “التمرين”، لكن إن المريض يفضل قادر على المشى والحركة والاعتماد على نفسه لأطول فترة ممكنة

الوقاية من المضاعفات
لما المريض يقعد فى السرير أو يقلل حركته لفترة طويلة، ممكن يحصل ضعف وضمور فى العضلات، وتيبس فى المفاصل، وقلة فى مدى الحركة. العلاج الطبيعى والحركة المناسبة بيساعدوا فى تقليل المضاعفات دى، وخصوصًا عند المرضى اللى مروا بفترات طويلة من عدم الحركة بعد العمليات أو الإصابات العصبية

التأهيل بعد إصابات المخ والحبل الشوكى
العلاج الطبيعى هنا بيكون جزء أساسى من برنامج التأهيل، سواء لتحسين القوة، أو التوازن، أو المشى، أو استخدام الأطراف، أو تدريب المريض على أداء الأنشطة اليومية حسب حالته. فى حالات إصابات المخ أو الحبل الشوكى، رحلة العلاج ممكن تكون طويلة وتحتاج تعاون بين أكتر من تخصص

مش كل ألم محتاج علاج طبيعى بنفس الطريقة

العلاج الطبيعى مش “روشتة واحدة لكل الناس”. التمرين اللى يناسب مريض ممكن يكون غير مناسب لمريض تانى، خصوصًا فى حالات الانزلاق الغضروفى، ضغط الأعصاب، بعد الجراحات، أو وجود ضعف عصبى. العلاج الطبيعى هنا بيكون جزء أساسى من برنامج التأهيل، سواء لتحسين القوة، أو التوازن، أو المشى، أو استخدام الأطراف، أو تدريب المريض على أداء الأنشطة اليومية حسب حالته

وعشان كده، التقييم الصحيح للحالة أولًا هو اللى بيحدد هل المريض محتاج علاج طبيعى، وإمتى يبدأ، وإيه نوع التمارين المناسبة له. وفى بعض الحالات، العلاج الطبيعى بيكون هو العلاج الأساسى، وفى حالات تانية بيكون جزء من خطة علاج أكبر تشمل الأدوية أو التدخلات أو الجراحة حسب السبب وشدة الحالة

وفى النهاية، نجاح علاج مريض المخ والأعصاب والعمود الفقرى هو منظومة متكاملة.

جراح المخ والأعصاب، طبيب الأعصاب، طبيب العلاج الطبيعى والتأهيل، أخصائى العلاج الطبيعى، التمريض، والأسرة.. كل واحد فيهم له دور مهم فى رحلة المريض.

والعملية الناجحة مش هدفها بس إن المريض يخرج من المستشفى، لكن الهدف الأكبر إننا نساعده يرجع يتحرك، ويعتمد على نفسه، ويرجع لحياته الطبيعية قدر الإمكان

كل الدعم والتقدير لكل أطباء وأخصائيى العلاج الطبيعى والتأهيل، ولكل أفراد المنظومة الطبية اللى بيبذلوا مجهود كبير كل يوم عشان يرجعوا الأمل والحركة والاستقلالية لمرضانا

كل سنة وكل أطباء وأخصائيى العلاج الطبيعى بخير، وشكرًا على دوركم المهم فى رحلة علاج مرضانا. ودمتم بصحة وعافية